SINGARAJA FM,-Kawentenan Desa Adat Busungbiu, Desa/Kecamatan Busungbiu Buleleng kacingak ramia ring makudang rahina sane lintang. Akeh krama lanang tedun ka alase antuk ngelaksanayang tradisi maboron Kidang, tradisi maboros kidang puniki sampun katami saking duk. Kidang sane kapolihang saking maboros pacang kaanggen sarana upakara rikala Pujawali Agung ring Kahyangan Tiga Desa Adat Busungbiu.
Pujawali punika kagelar nyabran
Purnama Kapat, lan warsa puniki nepek ring rahina Soma (6/10). Tradisi maboros
kalaksanayang tigang rahina nyanggra piodalan agung sane pinaka runtutan
upacaran adat.
Tradisi kakawititin antuk upacara
Ngajit, inggih punika prosesi nunas tuntunan majeng ring para panglingsir utawi
para ulu adat ring Pura Puseh Desa. Risampune polih pituduh lan nguningin indik
kawentenan kidang sane ketah kabaos I Bulu Pangi olih krama desa, akeh krama
tedun sinarengan. Dane sareng-sareng mamargi sawatara 8 kilometer nuju
wewidangan alas sane wenten ring wewidangan Desa Titab lan Desa Pucaksari.
Risampune ring genah sane katuju, krama kakepah dados
makudang pasukan, luirnyane pasukan sayap tengen lan sayap kiwa, antuk
ngalaksanayang maboron ring wewidangan inucap. Kelian Adat Desa Busungbiu, Gede
Yasa maosang tradisi puniki sampun kalaksanyang duk warsa sane sampun lintang.
Ring maboros puniki soang-soang krama makta piranti sane tajem minakadi blakas,
arit utawi pedang. Para krama ngangge atribut sane khas marupa pahpah biu sane
kapasang ring prabu utawi anyaman bambu, pinaka simbol kasayagayan. Maboros
kalaskanayang ring wewidangan alas Pangkung Biu, Desa Pucaksari, Kecamatan
Busungbiu. Antuk pujawali alit ketahnyane wantah asiki utawi aukud kidang sane
kaboros, nanging ring piodalan agung, akehnyane lebih saking aukud.
"Samian krama tedun ngawit
semeng ngantos wengi, ngantos polih kidang" baos Gede Yasa.
"Astungkara krama desa
prasida ngamolihang kidang antuk piodalan. Hasil maboros puniki kaanggen sarana
ring piodalan agung" teges Gede Yasa.
Sakemaon, Nyoman Sukarmen
negesang yening tradisi maboron kidang pinaka simbol gotong royobg krama
Busungbiu. Tradisi maboros kidang nenten wantah indik maboros, nangin pinaka
utsaha ngalestariang nilai-nilai budaya lan spritual krama Busungbiu sane sampun
pinaka tetamian.
" Kawentenan akeh krama
puniki sane nyihnahang kukuhnyane rasa antuk nuenang tradisi leluhur. Sinergi
pantaraning desa adat lan desa dinas taler mabuat mangda kahuripan sosial sayan
harmonis", baos Sukarmen.
0Komentar